惠英紅承諾《鐵探》收視33點笠絲襪出街　紅姐找數：萬晞華講嘢一定算數

惠英紅找數！當日《鐵探》未播出前開記者會時，惠英紅曾承諾《鐵探》收視有33點，就在鬧市笠絲襪扮安全套影相。《鐵探》早前播出大結局，收視剛剛好達33點。

惠英紅兌現承諾，今天（5月21日）下午在個人facebook開直播找數，身處港鐵站外的她說：「我萬晞華到咗一個地鐵站，依家就嚟找數，其實我萬晞華講嘢一定要算數嘅，如果唔係我點樣管治西九總區呢？除咗我找數外，我記得當日記者會，姜皓文都有話過佢找數嘅，黑仔我正式Call你喇，睇你喇，我依家就入去找數喇﹗」

然後紅姐把藍色絲襪笠上頭，並行到站內麵包店買麵包，之後還在站行了一圈，笑說：「最緊要開心，如我將自己開心SHARE出去幾好吖，我找咗數喇！記得我之外，當日姜皓文都講過笠絲襪，交個波畀你喇。」

聽到Madam Man的命令，Bingo都即時回應，在fb稱會今日之內找數：

紅姐！收到！Bingo今天內找數！

更預告今晚會於沙田新城市廣場現身找數。不少影迷都即時留言表示收工後要趕到商場等黑仔！

今次《鐵探》是惠英紅自2010年《巾幗梟雄之義海豪情》後，相隔9年重回TVB演出的劇集，結果收視理想外，展現神級演技，更被網民力撐奪今屆視后。